BADUNG, Média Bali – Pemerintah Provinsi Bali kasarengin Perwakilan Badan Kependudukan dan Keluarga Berencana (BKKBN) nglaksanayang konsolidasi sané matetujon antuk digelis nees tengkes, rahina Buda Paing Kuningan (15/6). Konsolidasi inucap kabungkah langsung olih Wakil Gubernur Bali Tjokorda Oka Artha Ardhana Sukawati (Cok Ace) ring Kuta, Badung.

Cok Ace maosang, pemerintah sampun ngwentuk Tim Percepatan Penurunan Stunting (TPPS) ngawit saking panta pusat kantos désa. Ring sajeroning ngamargiang makudang-kudang amongan makadi prakanti miwah fasilitasi program, parikrama miwah mautsaha ngukuhang panyiagayan asiki data tengkes, TPPS salanturnyané ngwentuk satgas. “Lianan punika taler kawentuk 3.327 Tim Pendamping Keluarga (TPK) sané sampun kaicénin pamurukan ring bulan Désémber 2021 raris pacang mawali kalaksanayang ring bulan Juni 2022,” baos dané.

Kawéntenan TPK madué amongan ngicén pendampingan majeng keluarga sasaran. “Yéning selehin saking panyiagayan SDM rauhé mangkin, kajan-tenang sampun tegep ring sajeroning nglaksanayang program percepatan penurunan stunting ring Provinsi Bali, punika mawinan pamargi inucap patut digelisang antuk ngrincikang miwah nabdabin samian program saha ngajantenang kawéntenan anggaran,” baos dané.

Konsolidasi sané kalaksanayang inucap, wantah pinaka pamargi kapertama ring provinsi sané matetujon nincapang pangwruhan indik program miwah parikrama antuk digelisang nees wilangan tengkes, saha  mangda program ring panta provinsi miwah kabupatén/kota sajebag Bali sida mamargi sinarengan tur madasar panyikian pikayunan. “Ngeninin anceng saking Provinsi Bali sampun tinas pisan inggih punika nees  prévalénsi tengkes dados 6,15% ring warsa 2024. Mangdané sida manggih wilangan inucap majanten I raga patut pisan mautsaha pinih becik,” weweh dané.
Pemerintah Daérah patut ngutamayang sumber daya sané kasiagayang antuk nincapang ayahan majeng kelompok sasaran Percepatan Penurunan Stunting nyangkupin para yowana, calon pengantin/calon pasangan usia subur (PUS), krama istri mobot, ibu menyusui saha anak alit sané mayusa 059 bulan. “Punika mawinan, ring pamargi Percepatan Penurunan Stunting muatang sané kabaos pendekatan intervénsi kompréhénsif,” baos dané.

Nanging selehin saking kahanan pandemi sané nyansan degdeg, Cok Ace nguduhang majeng makasami Tim Percepatan Penurunan Stunting mangdané digelis mamargi tur nincapang prakanti pantaraning samian OPD sareng séktor sané mapaiketan. “Kaaptiang samian OPD sané madué amongan sida nguningayang indik rencana parikrama wiadin program kajangkepin kawéntenan anggaran anggen utsaha digelis nees tengkes ring suang-suang dinas,” baos Cok Ace.

Paiketan dané ngaptiang mangda samian baga sané rauh prasida nyumakenang angga antuk digelis mautsaha nees tengkes ring Provinsi Bali. Kasumakenan sané kabaosang iwau nyangkupin utsaha nees tengkes mangda kaunggahang dados silih tunggil prioritas utama pawangunan ring pusat kantos padesanan, sumaken antuk nglimbakang sumber daya, sumaken sayan nincapang prakanti, saseleh, miwah évaluasi antuk mastikayang program puniki mamargi antar. “Kasumakenan puniki kabuatang pisan antuk ngajantenang samian angga rauh tur urati antuk nglimbakang pangupaya nees tengeks ring Provinsi Bali,” baos Ida.

Panitia Konsolidasi Percepatan Penurunan Stunting Tingkat Provinsi Bali, Désak Nyoman Triarsini ngwewehin, parikrama puniki madasar saking Peraturan Présidén Nomor 72 Tahun 2021 tentang Percepatan Penurunan Stunting (Lembaran Negara Republik Indonesia Tahun 2021 Nomor 172); Peraturan Badan Kependudukan dan Keluarga Berencana Nasional Nomor 12 Tahun 2021 tentang Rencana Aksi Nasional Percepatan Penurunan Angka Stunting Indonesia Tahun 2021-2024 (Berita Negara Republik Indonesia Tahun 2021 Nomor 1398); miwah DIPA Satker Perwakilan BKKBN Provinsi Bali Tahun Anggaran 2022. “Tetujonnyané wantah nincapang kualitas pamargin program percepatan penurunan stunting ring provinsi saha kabupatén/kota sajebag bali mangda sida mawesana tur mapikenoh tur tinas,” wedar dané.

Ring sajeroning parikrama punika kaaptiang sida nincapang pangwruhan indik program percepatan penurunan stunting ring Provinsi Bali. Lianan punika, pamargi inucap sida mamargi sinarengan sareng pawarah saking satgas percepatan penurunan stunting. “Panyikian pikayunan antuk samian parirrama miwah program ring panta  provinsi miwah  kabupatén/kota sajebag Bali,” sineb dané. 005/adt